فروع الديجتال ماركتنج

مجال ال Digital Marketing مجال متشعب وليه فروع كتير علي عكس ما الناس متخيلة انه سوشيال ميديا فقط (انا عارف ان انا قلت الجملة دي كتير بس ده الواقع)

المجال مالوش نهاية لان كل يوم في جديد و اللي كان ينفع امبارح اتغير النهارده و هيتغير بكرة

طب لو انا لسه ببداء هكون متاخر علي طول ؟

لا طبعا مش معني ان المجال متغير يبقي اللي هتتعلمه ملوش لزمة اكيد في اساسيات و الباقي بتابع و حتي المحترفين هتلاقيهم بيذاكروا و بيطوروا من نفسهم لكن الاول اعرف الاساسيات

التسويق زيه زي اي علم له اصول و قواعد وله فروع زي ما قلنا قبل كده انت محتاج تعرف المجال مكون من ايه و تبتدي تعرف عن كل فرع اكتر ايه ادواته و استخدماته وبعد كده اكيد هتلاقي نفسك في جزء منه

طب ايه هي فروع المجال الرئيسية ؟

الترتيب ملوش علاقة بالاهمية لازم تتعامل مع انواعه علي انها كلها مهمة ومكملة لبعضها

1- السوشيال ميديا (كلنا عرفينها ) فيسبوك -تويتر- لينكدان-جوجل بلس- انستجرام-سناب شات-الخ

2- أل SEO اختصار ل Search Engine Optimization اللي هو تحسين الظهور في محركات البحث و الهدف منه انك تحسن ترتيب موقع الشركة او العميل في الظهور في النتائج الاولي علي محركات البحث زي (جوجل -بينج-ياهو الخ) بس احنا الاهم لينا في الجزء ده هو محرك البحث جوجل لانه الاكثر استخدما في العالم العربي خصوصا و الاوسع انتشار في العالم بشكل عام و ده بيكون منغير تكلفة و بياخد وقت و محتاج خبرة

3- انتاج الفيديو (ممكن تكون بتكتب سكريبت الفيديو او بتقدمه مش بتكلم عن المونتاج و لا التصوير دي مهارات تانية لو عندك هتبقي اضافة ليك)

4- ال SEM اختصار ل Search Engine Marketing المقصود بيها التسويق عبر محركات البحث 0 خد بالك في فرق بينها و بين SEO) و ده عن طريق الاعلانات اللي بتظهر لما عميل يبحث في جوجل عن خدمة معينة و يطلع الاعلان بتاعك في اول تلات نتايج

5-ال Content او التسويق بالمحتوي (خد بالك الناس اللي حصرت المجال في السوشيال ميديا هم نفس الناس اللي حصرت المحتوي في قالب انه بوست علي الفيسبوك) المحتوي ممكن يكون فيديو زي النقطة اللي فوق او صورة او كلام و ممكن يكون علي السوشيال ميديا او علي موقع او مدونة او ايميل مع مراعة ان المحتوي بيختلف علي حسب هيتنشر فين يعني ايه ؟ يعني مثلا مينفعش تكتب كلام كتير في تويتر و لا انستجرام المعتمد علي الصور عكس الفيسبوك

-الايميل ؟! اه الايميل مش طريقة قديمة و لا حاجة في نوعية عملاء مش هتقدر توصلهم علي الفيس هو انت لو بتستهدف شركة او صاحب شركة او صانع قرار تفتكر هتلقيه مستني علي الفيسبوك ؟ ده غير انك ممكن تعمل newsletter او نشرة دورية لعملائك عن ايه الجديد

6-ال Branding الكلمة دي وراها شغل كتير اوي ممكن نختصرها في الاتي

لما اقولك BMW هتفكر في ايه ؟ فخامة ؟ جمال ؟ راحة ؟ امان ؟

كل منتج مشهور علشان يبقي ليه روح تحس بيها لما يتقال اسمه او تشوف لوجو ليه كان وراه مجهود كبير و ابحاث و دراسة و ليه تفاصيل كتير هتحتاج مقال لوحده

تقريبا احنا غطينا اهم التفرعات في المجال مستني اسالتكم ...